சபாநாயகர் பதவிக்கான மனு தாக்கல் செய்வதற்கான அவகாசம் இன்று முடியும் நிலையில் மக்களவையின் புதிய சபாநாயகர், துணை சபாநாயகரை ஒருமனதாக தேர்வுசெய்ய தேசிய ஜனநாயக கூட்டணி அரசு முயற்சி செய்து வருகிறது. இச்சூழலில், அவர்களை தேர்வுசெய்வது பற்றி எதிர்க்கட்சிகள், கூட்டணி கட்சி தலைவர்களோடு அமைச்சர்கள் ராஜ்நாத் சிங், கிரண் ரிஜிஜூ ஆகியோர் இன்று பேச்சுவார்த்தை மேற்கொண்டனர்.

பாஜகவை பொறுத்தவரை சபாநாயகர் பதவியானது பாஜகவிடம் இருக்க வேண்டும் என்று ஏற்கெனவே தேசிய ஜனநாயக கூட்டணி கட்சி தலைவர்களுடன் முதற்கட்டமாக பேச்சுவார்த்தை மேற்கொண்டது.

அதற்கு தெலுங்கு தேசம், ஐக்கிய ஜனதா தளம் கட்சிகள் ஒப்புக்கொண்டது. அதேசமயம், துணை சபாநாயகர் பதவி யாருக்கு செல்லும் என்பது குறித்த கேள்விகள் எழுந்தன.